میرے احساس کے دریا میں روانی تجھ سے
میرے احساس کے دریا میں روانی تجھ سے
اے گلِ جاں میرے ہونے کی نشانی تجھ سے
موسمِ گل بھی ترا فصلِ خزاں بھی تیری
میری آواز کے صحراوں میں پانی تجھ سے
تجھ سے ہی میری تمناوں نے وسعت پائی
آنکھ کے رنگ ، سماعت کے معانی تجھ سے
تجھ سے آنکھوں نے لیا رنگ پرکھنے کا ہنر
لفظ کی جادوگری نطق نے جانی تجھ سے
تو جو چاہے تو سمندر کو کنارا کردے
خاک کے بخت میں پیدا ہو گرانی تجھ سے